Bolqarıstanın Samokov şəhərində yeniyetmə güləşçilərin Avropa çempionatı keçirilmişdir. Yarışda Gəncə şəhərinin idmançılarıda layiqincə ölkəmizi təmsil etmişdirlər.
Millimizin üzvü Cavid Cavadov (51 kq) ilk mərhələdə moldovalı rəqibindən güclü olub. C.Cavadov dörddəbir finalda Ukrayna idmançısına heç bir şans tanımayıb. Yarımfinalda Ermənistan güləşçisi üzərində böyük hesablı qələbəyə sevinən Gəncə güləş məktəbinin yetirməsi adını finala yazdırıb. Ancaq zədələndiyi üçün finalda Rusiya təmsilçisi ilə güləşməyib və gümüş medalla kifayətlənib.
Abdulrəhman İbrahimov (60 kq) debütdə ukraynalı güləşçi üzərində inamlı qələbəyə sevinib. Həmyerlimiz daha sonra türkiyəli pəhləvanı üstələyib. A.İbrahimov Polşa təmsilçisinə də aman verməyərək yarımfinala yüksəlib. Gürcüstan idmançısını “tuşe” ilə yolundan kənarlaşdıran təmsilçimiz finala vəsiqə qazanıb. Rusiyalı güləşçi ilə həlledici görüşdə minimal fərqlə məğlub olan A.İbrahimov Avropa ikincisi olub.
Qeyd edək ki, daha əvvəl digər güləşçimiz Musa Verdiyev (48 kq) qitə birinciliyinin gümüş medalını qazanmışdır.
Dünən vətənə qayıdan idmançıların qarşılama mərasimi olmuşdur. Qarşılama mərasimində Gəncə Şəhər Gənclər və İdman Baş İdarəsinin rəisi Həmid Nəsirov, Vətən müharibəsi iştirakçıları, Qazilər, Uşaq Gənclər İdman Məktəblərinin və şəhərin idman ictimaiyyətinin nümayəndələri iştirak etmişdir.
Tədbirdə Baş İdarənin rəisi Həmid Nəsirov çıxış edərək Gənclər və İdman Nazirliyinin rəhbərliyinin və Gəncə Şəhər İcra Hakimiyyəti başçısının təbriklərini idmançılara çatdırmış və onlara gələcək yarışlarda uğurlar arzulamışdır. Tədbirdə həmçinin qazilər, şəhərin idman ictimaiyyətinin nümayəndələri də çıxış edərək, gənc idmançılarımızın uğurlarına sevindiklərini və gələcəkdə bundan da daha böyük qələbələr qazanacaqlarına əmin olduqlarını bildirmişlər.
