Sabirabad şəhərinin Mədəniyyət Mərkəzində Azərbaycan Respublikasının Mədəniyyət Nazirliyi və Sabirabad Regional Mədəniyyət İdarəsinin birgə təşkilatçılığı ilə Azərbaycanın Milli Qəhrəmanı Səfiyar Behbudova həsr olunan tədbir keçirilmişdir.
Rayon ziyalılarının, ictimaiyyət nümayəndələrinin, Milli Qəhrəmanın yaxınlarının və doğmalarının iştirak etdiyi tədbirdə Sabirabad Rayon İcra Hakimiyyəti başçısının birinci müavini Həsən Həsənov, Mədəniyyət Nazirliyinin əməkdaşı Almaz Sultanzadə, filmin rejissoru Kəmalə Musazadə, yazıçı-publisist Azər Hacıbəyli, Milli Qəhrəman Səfiyar Behbudovun bacısı Naibə Behbudova və qəhrəmanın döyüş yoldaşları çıxış edərək bu cür filmlərin çəkilməsinin və təqdimatların keçirilməsinin insanlara, xüsusən gənclərə vətənə-torpağa sevgi hisslərinin aşılanmasında mühüm əhəmiyyətə malik olduğunu bildirmişlər.
Daha sonra Mədəniyyət Nazirliyinin sifarişi ilə “Salnaməfilm” studiyasında Milli Qəhrəmanı Səfiyar Behbud haqqında çəkilmiş “Qəhrəmanlıq zirvəsi” sənədli filminin nümayişi təşkil olunmuşdur.
