Məlum olduğu kimi III MDB İdman Oyunları bu il Azərbaycanda keçiriləcək. Oyunların keçirilməsi üçün ölkə üzrə bir neçə şəhər seçilsə də, əsas oyunlar Gəncə şəhərində baş tutacaq. Prezident İlham Əliyevin tapşırığı ilə Gəncə şəhərində genişmiqyaslı təmir-tikinti və abadlıq işlərinə başlanılıb. Bununla əlaqədar olaraq, Gəncə Şəhər İcra Hakimiyyətinin başçısı Niyazi Bayramov şəhərin müxtəlif ərazilərində aparılan işlərlə yerində tanış olub.
Şəhər rəhbərinə məlumat verilib ki, hazırda Atatürk prospektində, Gəncəçay Park-Bulvar Kompleksində, Fikrət Əmirov adına parkda, Nizami kinoteatrının qarşısında yerləşən və “Nizami Parkı” kimi tanınan ərazidə, həmçinin digər yerlərdə genişmiqyaslı təmir-bərpa işləri aparılır. Belə ki, prospekt boyunca yerləşən çoxmənzilli və fərdi yaşayış evlərinin fasadları yenilənir, dam örtükləri dəyişdirilir, istirahət məkanlarında əsaslı yenidənqurma işləri həyata keçirilir. Eyni zamanda, bu ərazilərdə yollar təmir olunur və yeni asfalt örtüyü salınır.
Niyazi Bayramov görülən işlərin gedişatı ilə yerində tanış olduqdan sonra aidiyyəti qurumlara müvafiq tapşırıq və tövsiyələrini verib.
Qeyd edək ki, III MDB İdman Oyunları 28 sentyabr – 8 oktyabr tarixlərində Gəncə, Yevlax, Mingəçevir, Qəbələ, Şəki, Göygöl və Xankəndi şəhərlərində keçiriləcək.
