Aqrar sahədə sahibkarlıq fəaliyyəti ilə məşğul olan subyektlərlə əlaqələrin genişləndirilməsi, təhsil və elmi-tədqiqat sahələrində əldə olunan nəticələrin istehsalatda tətbiqi, kənd təsərrüfatında texnoloji proseslərin elmi əsaslarla idarə olunmasına dair fermerlərə təlimlərin keçirilməsi Azərbaycan Dövlət Aqrar Universitetinin (ADAU) müvafiq kafedralarının iş planlarına daxil edilərək əsas vəzifələrdən biri kimi qarşıya qoyulmuşdur. Təlimlərin təşkilində mövzuların aktuallığı, dövlətin aqrar siyasətindən irəli gələn vəzifələrə, mövsümə və texnoloji proseslərə uyğunluğu, fermerlər üçün cəlbedici olması əsas götürülmüşdür.
Fermer təsərrüfatlarının maarifləndirilməsi, uçot işinin təşkilinə kömək məqsədilə Azərbaycan Kənd Qadınları Assosiasiyası ilə əməkdaşlıq çərşivəsində ADAU-nun Mühasibat uçotu və audit kafedrasının əməkdaşları Rövşən Məmmədov və Elay Zeynallı Ağcabədi rayonunda “Mikro müəssisələrdə qeydiyyat və uçotun təşkili” mövzusunda təlim keçmişlər. Təlim çərçivəsində mühasibat uçotunun elementləri, uçotun təşkili məsələləri, uçotun ilkin və icmal sənədlərinin işlənilməsi, maya dəyərinin hesablanmasına dair fikirlər söylənilmiş, təlim iştirakçılarını maraqlandıran suallar cavablandırılmışdır. Sonda növbəti təlimin mövzusu və keçirilmə tarixi müəyyən edildi.
