Azərbaycan Respublikası Mədəniyyət Nazirliyinin təşkilatçılığı ilə 13-15 oktyabr tarixlərində ölkəmizdə keçirilən Türkmənistan Mədəniyyəti Günləri Gəncə şəhərində geniş konsert proqramı ilə başa çatıb.
Oktyabrın 15-də F.Əmirov adına Gəncə Dövlət Filarmoniyasında təşkil olunan konserti idarə və təşkilatların rəhbərləri, ictimaiyyət nümayəndələri və sənətsevərlər izləyiblər.
Proqramda həm Türkmənistan, həm də Azərbaycan sənətçilərinin çıxışları yer alıb. Türkmənistanın Xalq artistləri və folklor-etnoqrafik kollektivlər çıxış edərək dostluq və həmrəylik ruhunu ifadə ediblər.
Azərbaycanı tədbirdə Xalq artistləri Gülyanaq və Gülyaz Məmmədova, Əməkdar mədəniyyət işçisi Mehparə Cəfərova, Rüstəm Cəfərov, Səhri Əliyeva, eləcə də Göygöl Dövlət Mahnı və Rəqs Ansamblı təmsil edib.
Türkmənistan tərəfdən Jemal Saparova, Bahar Annayeva, Maya Orazberdiyeva, Kerwen Yovbasarov, Rüstəm Hallyyev və “Dokmaçylar” folklor-etnoqrafik ansamblı səhnədə yaddaqalan proqram təqdim ediblər.
Hər iki xalqın sənətçiləri birgə ifalarla səhnədə dostluq və mədəni yaxınlığın simvoluna çevriliblər.
Bağlanış konserti iştirakçılar tərəfindən alqışlarla qarşılanıb və tamaşaçılarda iki ölkə arasında mədəni əlaqələrin gələcəkdə də daha sıx davam edəcəyinə inam yaradıb.
