Gəncə-Daşkəsən Regional Təhsil İdarəsi və Təhsil işçiləri Azad Həmkarlar İttifaqı Gəncə şəhər komitəsinin təşəbüsü ilə tanınmış maarif xadimi, “Şərəf nişanı” ordenli, “Əməkdə fərqlənməyə görə” medallı Şıxı Ələsgərovun 90 illiyinə həsr olunmuş riyaziyyat fənn olimpiadasının qaliblərinin mükafatlandırılması mərasimi keçirilib.
Ömrünün 50 ildən çoxunu gələcəyimiz olan uşaqların dövlətimizə, cəmiyyətimizə layiq əsl vətənpəvər vətəndaş kimi yetişməsinə sərf etmiş maarif xadimi, Zəngəzur mahalı, Mehri rayonu Aldərə kəndində dünyaya göz açmış Ələsgərov Şıxı İbrahim oğlunun şərəfli həyatından söhbət açılıb. Məkirdən, riyadan, yalandan uzaq, səmimi, təvazökar, qayğıkeş olan Şıxı müəllim sanki yanar şam idi… Əsl təhsil fədaisi idi… Maarif pərvanəsi kimi ömrünü gilə-gilə gənclərin, yeniyetmələrin təlim-tərbiyəsinə verib. Ensklopedik bilik və bacarığı, pedaqoji ustalığı ilə Gəncə təhsilinə dayaq olub. Gəncə şəhərində küçələrdən biri Şıxı müəllimin adını daşıyır.
Yubiley ərəfəsində Gəncə şəhəri üzrə təhsil sektorunun tabeliyində fəaliyyət göstərən ümumtəhsil məktəblərinin 7-ci sinif şagirdləri arasında 2 mərhələdən ibarət riyaziyyat olimpiadası təşkil edilib. Olimpiadanın məktəb mərhələsində mübarizə aparan 3467 nəfər şagirddən 53 nəfəri şəhər mərhələsində iştirak etmək hüququ qazanıb. Şəhər mərhələsində iştirak edən 53 nəfərdən isə 3 nəfər şagird riyaziyyat olimpiadasının qalibi olublar. Olimpiadanın yekunu olaraq, I yerin ortaq qalibləri – Gəncə şəhər Ş.İ.Xətai adına 13 nömrəli tam orta məktəbin 7-ci sinif şagirdi Əhmədov Raul, Gəncə şəhər 21 nömrəli tam orta məktəbin 7-ci sinif şagirdi Allahverdiyev Raul, II yerin qalibi Gəncə şəhər 26 nömrəli məktəb-liseyin 7-ci sinif şagirdi Yusubov Yusif, 3-cü yerin qalibi – Gəncə şəhər 32 nömrəli tam orta məktəbin 7-ci sinif şagirdi Nəsiri Xədicə layiq görülüblər. Gəncə Daşkəsən Regional Təhsil İdarəsinin müdiri Anar Qədiməliyev, Təhsil işçiləri Azad Həmkarlar İttifaqı Gəncə şəhər komitəsinin sədri Bayram Hacıyev Olimpiada qaliblərinə mükafatları təqdim ediblər.
Zabit XƏLİLOV,
“Respublika”.