Gəncə Regional Mədəniyyət İdarəsinin, “Cavad xan” Tarix və Mədəniyyət Fondunun, “Qardaşlıq” qrupu, Göygöl Gənclər və İdman İdarəsinin, Göygöl Olimpiya Kompleksinin birgə təşkilatçılığı ilə Gəncə və Göygöldən 67 ailədən olan 118 şəhid övladına həsr olunmuş “Qəhrəman övladları” İdman Festivalı keçirilmişdir.
Festivalda 7-12 yaş qrupundan olan şəhid övladları 6 komandadan ibarət olmaqla estafet yarışmasında iştirak etmişlər.
Komandalara kapitanlığı və mükafatlandırmanı Azərbaycanın məşhur idmançılarından olan Olimpiya, Dünya, Avropa çempionları və mükafatçıları Hacı Əliyev, Namiq Abdullayev, Mövlud Mirəliyev, Rövşən Bayramov, Mariya Stadnin, Şərif Şərifov, Ramin Qasımov, Hakim Nəzərəliyev, İslam Abbasov etmişlər.
İdman festivalında şəhid övladlarına xoşladığı idman növünə yerindəcə yazılmaq və təmənnasız məşğul olmaq imkanı yaradılmışdır.
Tədbirin bədii hissəsində Gəncə Regional Mədəniyyət İdarəsinin rəisi Vasif Cənnətovun rəhbərliyi ilə F.Əmirov adına Gəncə Dövlət Filarmoniyasının “Göygöl” Dövlət Mahnı və Rəqs Ansamblı və musiqi qrupu, Gəncə Dövlət Dram Teatrı, Gəncə Dövlət Kukla Teatrı və Gəncə şəhər 4 nömrəli Uşaq Musiqi Məktəbinin muğam qrupu iştirak etmişlər.
Tədbirdə Respublikanın Əməkdar artisti Elçin Elçiyevin rəhbərliyi ilə F.Əmirov adına Gəncə Dövlət Filarmoniyasının “Göygöl” Dövlət Mahnı və Rəqs Ansamblının (bədii rəhbər Sahil Quliyev, baletmeyster Sənan Cavadov) musiqi qrupu (solistlər Xəyal Əliyev, Rövşən Məmmədov, İlham Qasımov, Əli Məmmədov) vətənpərvərlik mahnıları, “İgidlər” və “Cəngi” rəqsini təqdim etmişlər.
Respublikanın Əməkdar Mədəniyyət İşçisi Əli Qasımovun rəhbərliyi ilə Gəncə Dövlət Dram Teatrının aktyorlarının ifasında Nizami rolunda – Əməkdar artist Elxan Abbasov, Cavad xan rolunda – Əməkdar artist Ramiz Vəliyev festival iştirakçılarını salamlamışlar.
Respublikanın Əməkdar artisti Fərmayıl Paşayevin rəhbərliyi ilə Gəncə Dövlət Kukla Teatrının aktyorları, Əməkdar artist Xudayət Əsgərov, Fəxri Mədəniyyət işçiləri Səməd Xanəhmədov, Elman Vəliyev və aktyorlar Nərmin Şərifov, Zülfiyyə Əliyeva festival iştirakçılarına yazıçı-dramaturq Əhməd Orucun “Zingirovlu pişik” tamaşasından bir parça təqdim etdilər.
İdman festivalında Gəncə şəhər 4 nömrəli Uşaq Musiqi Məktəbinin şagirdlərindən ibarət muğam üçlüyü (bədii rəhbər, məktəbin müəllimi Vüqar Bağırov) “Qarabağ şikəstəsi”ni ifa etmişdir.
İdman festivalında Gəncə və Göygöl rayon İcra Hakimiyyətinin nümayəndələri, qardaş Türkiyə Cümhuriyyətinin Gəncə Baş Konsullu Zeki Öztürk, Azərbaycan Respublikasının Mədəniyyət Nazirliyinin yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin rəisi Həsən Mirzəyev iştirak etmişlər.
“Qəhrəman övladları” İdman Festivalı şəhidlərimizin əziz xatirəsinə olan dərin hörmət və ehtiramın kiçik bir təzahürüdür.
“Şəhidlər ölməz Vətən bölünməz!”
