Yusif Yusibov : BİZ DƏ VƏTƏN ƏSGƏRİYİK!

Bu gün Ali Baş Komandan cənab Prezidentimizin rəhbərliyi altında  Azərbaycan xalqının qəhrəmanlıq salnaməsinə yeni-yeni şərəfli səhifələrin yazıldığı gündür. Bu gün erməni faşizminin Azərbaycan xalqına dəfələrlə etdiyi xəyanətin, körpələrin, yaşlı insanların, qız və qadınlarımızın tökdükləri qanların, vəhşiliklə törədilən dəhşətli  Xocalı soyqırım intiqamının alındığı gündür. Bu gün düşmən ayaqları altında inildəyən dədə-baba torpaqlarımıza 3 rəngli bayrağımızın sancıldığı gündür.

Havadarlarına arxalanan erməni faşizmi torpaqlarımızda at oynatdı, qondarma Dağlıq Qarabağ dövləti elan etdi, seçkilər keçirdi, Baş nazir Paşinyan yeni prezidentin elan olunması münasibətilə döyünən ürəyimiz Şuşada saymazyana şərab içib yallı getdi, Şuşanı paytaxt etməyə qərar verildi. Dişlərində şirə qaldığından yenidən torpaqlarımıza göz dikərək 27 sentyabr tarixində sərhəd boyu hücuma keçib hərbi hissələrimizə, dinc əhaliyə iri çaplı silahlardan güllələr, mərmilər yağdırdılar. Qanlar töküldü, həlak olanlar oldu.

30 ildir  heç kimin torpağında gözü olmayan, sülh  carçısı Azərbaycan xalqı səbrlə bu günü gözlədi.  Hər bir vətəndaşını uşaqlıqdan azərbaycanlılara, qardaş Türk xalqına düşmənçilik əhval-ruhiyyəsində tərbiyə edən erməni faşizmi xalqımın səbrinə son qoydu. Ali Baş komandanın əmri ilə ordumuz bütün cəbhə boyu əks-hücuma keçdi. Bu gün erməni faşizminin qüdrətli Azərbaycan ordusunun qabağında diz çökən gündür. Xalqımız 30 ildir bu dərəcədə  qürurlanmamışdır.

İllərlə xalqımızın haqq səsini eşitməyən, işğal olunan torpaqlarımızın geri qaytarılması haqqında yalnız yalan vədlərlə  Qarabağın  unudulmasına çalışan ermənipərəstlər əsgərlərimizin yenilməz igidliyini, sonsuz Vətən, Torpaq sevgisini, qələbə əzmini görəndə əl-ayağa düşüb cənab Prezidentimizi müharibəni dayandırmağa, danışıqları bərpa etməyə səslədilər. Bu çağırışlara  İlham Əlihyev cənablarının verdiyi əsaslı, cəsarətli cavablar hər birimizdə iftixar hissi yaratdı. Xalq bir daha şahid oldu ki, Ali Baş komandanı, Prezidenti ordumuzla birlikdə sıxıntılara, torpaq həsrətinə son qoymaq əzmindədir. Bu gün on minlərlə gənc könüllü surətdə cəbhəyə getmək, düşmənlə vuruşmaq, günahsız insanların qanını almaq, torpaqlarımızı qaytarmaq, bayrağımızı Şuşada, işğal olunmuş hər kənddə, şəhərdə ucaltmaq tələbindədir. Belə bir müqəddəs istək əsl vətəndaşlığın, Ali Baş komandana, dövlətimizə inamın əks-sədasıdır. Təsadüfi deyil ki, Ermənistanın işğalçı siyasətinə etiraz olaraq Azərbaycanda fəaliyyət göstərən 50-dək siyasi partiya rəhbərlərinin birgə bəyanatı yekdilliklə Prezidenti dəstəklədiklərindən  xəbər verir.  Bu gün xalqın öz Prezidenti ətrafında sıx birləşdiyi, Prezidentinə inamın təntənəsi günüdir. Lakin yenə də həmişə olduğu kimi Müsavat və Azərbaycan Xalq Cəbhəsi partiyaları öz xəyanətkar mövqeləri ilə seçilərək  həmrəylik nümayiş etdirmədilər. Özlərini həmişə xalqın, millətin yanında olduqlarını göstərməyə çalışan Musavat və Azərbaycan Xalq Cəbhəsi partiyaları təəssüflər olsun ki, Vətənimizin bu ağır günündə, torpaqlarımızın erməni işğalından azad edilməsi üçün şanlı ordumuzun uğurlu əks-hücum əməliyyatlarına digər siyasi partiyalarla birlikdə dəstək vermədilər. Ali Baş Komandan İlham Əliyevin bu sahədə həyata keçirdiyi siyasəti dəstəkləməmələri onların sımimi olmadıqlarını və əsl simalarını bir daha açıb göstərdi. Xalqın 30 il səbirsizliklə gözlədiyi Vətən müharibəsinin başlamasının ilk günündə Musavat və Azərbaycan Xalq Cəbhəsi partiyaları ümummilli dəyərlərə sahib çıxmayaraq, Vətən torpaqlarının düşmən tapdağından azad edilməsinə sevinməyərək düşmən dəyirmanına su tökdülər. Siyasi ədavət saxlayan bu partiyalar belə tarixi günlərdə Ali Baş Komandanın yanında olmaq qabiliyyətini göstərmədilər.

Erməni faşizmi ənənəvi olaraq real  simasını göstərməkdədir. O, kəndlərimizi, dinc əhalini nişana almaqdan çəkinmir, nəticədə çoxsaylı evlər dağılmış, günahsız insanlar, hətta bir ailədən 5 nəfər mərmi qəlpələri ilə həlak olmuşlar. Cənab İlham Əliyev Dağlıq Qarabağ ermənilərinə müraciətdə ordumuzun dinc əhali ilə ədavəti olmadığını dönə-dönə bildirmişdir. Azərbaycan döyüşçüləri yanız muzdlu əsgərlərlə, doğma torpaqlarımızda bizə qarşı əlinə   silah alanlarla döyüşür. Biz başqa yad torpaqlarda deyil, öz torpağımızda, öz torpağımızın işğaldan azad olunması uğrunda vuruşuruq. Dünya da görür ki, Azərbaycan ordusu tərəfindən dinc əhaliyə bir dəfə də olsun silah tuşlanmayıb, bir güllə, mərmi də atılmayıb. Çünki ordumuz  haqqın, ədalətin, onun bərqərar olması uğrunda savaşa qalxıb. Birləşmiş Millətlər Təşkilatının Təhlükəsizlik Şurası tərəfindən Azərbaycana təcavüzlə bağlı qəbul olunan qərarlara əməl etməyən erməni hakimiyyəti, müharibə qanunlarını, beynəlxalq hüquqları da kobud şəkildə pozmaqdan çəkinmir. Burada da Azərbaycan humanizmi, Azərbaycan reallığı ilə erməni xisləti, erməni vəhşiliyi üz-üzə dayanır. Bu gün erməni vəhşiliyinin məğlubiyyatı, xalqımızın isə vəhşilik üzərində  qələbəsi günüdür.

Biz qalib gələcəyik! Prezidentimiz demişkən, bizim döyüşümüz haqq döyüşüdür. Sevindirici haldır ki, Azərbaycan 3 rəngli bayraqlarla bəzənib. Küçələrdə dəstə-dəstə insanlar “Ya Qarabağ, ya ölüm!”, “Şəhidlər ölməz, Vətən bölünməz!” şüarları səsləndirib ordumuzla, dövlətimizlə həmrəy olduqlarını bildirirlər. Gəncə Dövlət Universitetinin rəhbərliyi, çoxsaylı professor-müəllim heyəti həmişə olduğu kimi, bu sınaq günlərində də Ali Baş Komandanın ətrafında sıx birləşib qələbələrimizi alqışlayır və hər an Vətənin, Torpağın bütövlüyü naminə  veriləcək tapşırıqları yerinə yetirməyə hazır olduqlarının bildirir.

Professor Yusif Yusibov,

Gəncə Dövlət Universitetinin rektoru.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

This site uses Akismet to reduce spam. Learn how your comment data is processed.